Gomez bumigay kay Hohmann, kampeon sa MP Cup 10-Ball tourney
MANILA, Philippines - Naisuko ni Roberto “Superman” Gomez ang limang racks na kalamangan para matalo kay Thorsten “The Hitman” Hohmann ng Germany, 12-13, sa MP Cup GenSan Tuna Festival International Open 10-Ball Tournament singles na pinaglabanan kamakailan sa General Santos City.
Nagtabla ang dalawa sa 4-4 bago rumatsada si Gomez ng panalo sa walo sa sumunod na 11 racks upang umabot sa hill.
Pero nanlamig si Gomez at natalo sa race-to-13 alternate break format kompetisyon na inorganisa ng Pambansang kamao na si Manny Pacquiao.
Ang panalo ni Hohmann ang kumumpleto sa pag-bangon mula sa one-loss side matapos masilat ni Lauro Bongay.
Umabot sa 92 players ang naglaro at nalaglag si Hohmann nang natalo kay Romeo Silvano, 11-8.
Bumangon siya sa one-loss bracket para samahan sina Gomez, Silvano at Dennis Orcollo.
Galing sa loser’s side rin si Gomez habang hindi natalo sa elims sina Silvano at Orcollo.
Pero lumutang ang galing nina Gomez at Hohmann sa knockout semis at tinalo ng una si Orcollo, 11-9, habang umani ng 11-8 tagumpay ang huli kay Silvano. (AT)
- Latest
