Orange sud na’s finals sa Sunday Club

CEBU, Philippines - Nakabawos ang Orange team sa  “rematch” nila uban sa team Violet, 79-72  atol sa crossover semifinals aron makaangkon og lingkoranan sa finals sa SRP Sunday Club 6th Founding Anniversary League basketball tournament niadtong Domingo didto sa San Roque Parish gym sa barangay Subangdaku, dakbayan sa Mandaue.

Kahinumduman, ang Orange napilde ngadto sa Violet atol sa elimination round.

Ang kuwadro-alas sa Orange team nga silang Gideon ‘The Finisher’ Ipili,  Dodod ‘Skywalker’ Colina, Ritchie ‘Playmaker’ Tecson ug Ohing ‘Triggerman’ Ortiz  maoy misalida’g maayo sa hinapos nga bahin sa final period aron mapusoy ang Violet.

Si Ipili midiga og 14 puntos, gisundan sa tandem nilang Colina ug Tecson nga parehong mihirit og 13 puntos, samtang si Ortiz miantog og nuybe puntos.

Giyawaan sab si Colina sa rebounding diin milangkat siya’g unom ka rebounds sa fourth quarter lang, apan ang nakapatay sa Violet mao ang tres ni Tecson nga maoy mibingat og maayo sa  labaw sa Orange ngadto sa singko puntos, 77-72 sa himalatyong oras sa duwa.

Milabaw unta ang Violet, 70-69 human sa tres ni Robert Sagayno, sa nahabiling 3:15 sa duwa, apan ang Orange mihimog 5-0 run aron mailog pagbalik ang momentum, 74-72.

Ang natagak nga Violet gipangulohan ni Anton Ontong, kinsa mipabuhagay og 12 puntos, si  Andrew Auxtero mitampo’g 11 puntos ug si Romy Rosaroso mitimbre’g 10 puntos. (BANAT NEWS)