Goldberry Iloilo Hotel nag-una
CEBU, Philippines- Misutoy ngadto sa unahan ang Goldberry Iloilo Hotel human ilang gilamoy ang San Jose Bakeshop sa iskor, 72-38 sa sangka sa Division A sa nagpadayon nga The Avenir Cup-SHAABAA 19th season kaniadtong Huwebes sa gabii didto sa Sacred Heart School Old Campus gym sa dan Gen. Maxilom avenue, ning dakbayan.
Ang Goldberry mao na karo'y nagtungtong sa kinatas-an sa team standings sa ilang 7-1 nga baraha.
Sa laing duwa sa Division A, nakatabla sa ikaduhang pwesto ang RDAK Stallions human ilang gipukan ang Colours, 44-36 samtang sa ikatulo ug kataposang engkwentro sa Division A, gidaro sa Cebu Landmasters ang Batch 2014 sa iskor, 60-44.
Ang MVP nga si Jeremy Huang ug ang kanhi multiple MVP awardee nga si Dave Lim, parehong miposa og 12 puntos aron pangulohan ang opensa sa Goldberry Iloilo Hotel samtang mihimo sab og 12 puntos alang sa San Jose Bakeshop si Blake Montalban.
Wala'y nakahimo'g double figures alang sa RDAK Stallions kinsa gipangulohan ni Bernard Chioson sa iyang nuybe puntos samtang si Dan Tecson maoy nangu sa Colours sa iyang 12 puntos.
Sa laing bahin, ang Cebu Landmasters kinbsa nakalambigit karon og three-way tie sa second place uban sa Gaisano Capital ug RDAK Stallions, gipangulohan sa managsuon nga silang Borgy ug Justin dela Cruz sa ilang 13 ug 12 puntos, matag usa samtang si Christopher Consunji midugang og 11 puntos.
Ang 1-7 nga Batch 2014, gipangulohan ni AJ Ong sa iyang 14 puntos samtang si Esidon Hao midugang og 11 puntos. (BANAT NEWS)
- Latest
