Magis Eagles mibihag sa Dragons
CEBU, Philippines - Yano kaayong gibihag sa Sacred Heart School-Ateneo de Cebu (SHS-AdC) Magis Eagles ang kontrang Don Bosco Technology Center (DBTC) Greywolves, 92-37 aron pabilin nga way pilde sud sa unom ka duwa sa juniors division sa 14th Cebu Schools Athletic Foundation Inc. (CESAFI) basketball tournament kagahapon diha sa Cebu Coliseum.
Samtang ang University of San Carlos (USC) Baby Warriors way kukahadlok miihaw sa Cebu Eastern College (CEC) Dragons.
Sa laing bahin, ang defending ug 10-time champion University of the Visayas (UV) Green Lancers mosuway og kulit sa labing una nilang back-to-back win karon nga season dihang ilang ikasangka ang University of Cebu (UC) Webmasters karong gabii sa collegiate division.
Ang Magis Eagles kanunay naglabaw ug gitapos nila ang halftime sa iskor nga 39-18.
Gani si SHS-AdC coach Rommel Rasmo wala na mopasulod nilang Jose Piero Dominic Longa, Steven Co ug Kevin Brian Johnson aron sila makapahuway alang sa mas krusyal nga duwa.
Si Joshua Sinclair mitusik og 21 puntos, samtang sila si Zachary Lance Eden Huang ug Andrew Vincent Velasco mitukob og 12 ug 11 puntos matag usa alang sa Magis Eagles nga usa na lang ka daog aron maharos nila ang pito ka duwa sa elimination round. Ang Greywolves wala pa makatilaw og daog sa unom ka duwa.
Sa iyang bahin, si Kent John Malazarte maoy nangu sa Baby Warriors sa iyang 16 puntos, samtang si Garnird Leopoldo sa Dragons nga mibugwak sab og 16 puntos.
PUNTOS MATAG USA
Unang duwa:
SHS-AdC (92) – Sinclair 21, Huang 12, Velasco 11, Nacua 8, Visser 8, Chua 7, Mantua 7, Araw-araw 6, Mayol 6, Jaboneta 6.
DBTC (37) – Asignar 9, Adlawan 7, Dela Torre 6, Saludes 4, Duque 4, Macam 3, Agustinez 2, Jumao-as 2.
Ikaduhang duwa:
USC (53) – Malazarte 16, Ting 9, Laurente 6, Galado 5, Mavilla 3, Pakana 3, Sususco 3, Echiverri 2, Chavez 2, Smith 2, Sevilla 2.
CEC (40) – Leopoldo 16, Buli-buli 7, Mate 7, Cinco 6, Orillaneda 2, Sullano 2. (BANAT PALARO)
- Latest
