Baby Warriors nakaipsot
CEBU, Philippines - Mipatigbabaw ang mas dagku ug mas teamwork nga University of San Carlos (USC) Baby Warriors batok sa Cebu Institute of Technology-University (CIT-U) Wildkittens sa secondary match sa 14th Cebu Schools Athletic Foundation Inc. (CESAFI) basketball tournament kagahapon diha sa Cebu Coliseum.
Apan dili tiaw ang kakulba nga ilang gibati kay igo lang sila midaog og usa ka lugas sa iskor nga 65-64.
Sa laing duwa, gikastigo sa University of Cebu (UC) Junior Webmasters ang Don Bosco Technology Center (DBTC) Greywolves sa iskor nga 75-37.
Pirmeng sikit ang duwa sa USC Baby Warriors ug CIT-U Wildkittens, apan nagbayad og mahal ang nauwahi tungod sa daghan nilang sipyat gikan sa free throwline.
Sama sa Wildkittens, dili sab epektibo ang USC Baby Warriors sa ilang tirada gikan sa free throw line ug posibleng bunga sa kakulba.Silang Jean Jacque Antigua ug Kent John Malazarte maoy nangu sa wala pay pildeng USC Baby Warriors sa ilang 16 ug 15 puntos matag usa.
Ang USC Baby Warriors nagsawo na karon sa liderato uban sa Sacred Heart School-Ateneo de Cebu (SHS-AdC) Magis Eagles sa managsama nilang 3-0 nga baraha.
Sa habig sa CIT-U Wildkittens, kinsa nagtangag og 2-3 nga baraha, gipangulohan nilang Joshua Philip Manatad ug Jasper Berezo parehong mibahog og 16 puntos, gisundan ni Justin Jules Langres sa iyang 15 puntos.
Sa laing bahin, ang UC Junior Webmasters nga adunay 3-2 nga baraha, gipangulohan ni Darrel Shane Menina, kinsa mikubkob og 16 puntos, samtang si Richestel Isla mitimbre’g 12 puntos ug silang Arvin Dungog ug Rico Quiamco Jr. mitampo’g 10 puntos matag usa.
Bugtong si Jules Grant Asignar lang ang player sa DBTC Greywolves nga nakahimo’g double figures nga adunay 13 puntos. (BANAT PALARO)
- Latest
