USC Warriors makigsangka sa UC Webmasters

CEBU, Philippines- Mangahas ang University of San Carlos (USC) Warriors paglansang sa ilang ikatulong daog sa pakigsangka nila batok sa  University of Cebu (UC) Webmasters sa bugtong duwa sa seniors division    sa 14th  Cebu Schools Athletic Foundation, Inc. (CESAFI) karong adlawa diha sa Cebu Coliseum.

Sa juniors division, magtakus ang mga way pildeng University of the Visayas (UV) Baby Lancers ug Sacred Heart School-Ateneo de Cebu (SHS-AdC) Magis Eagles. Ang SHS-AdC nagtinguha nga mosakmit sa solong liderato nga gihuptan  karon sa UV.  Ang Lancers nagbitbit og 3-0 nga baraha, samtang ang Magis Eagles nagtangag og 2-0 win-loss record.

Ang 2-1 nga Warriors bag-o lang mikulit og 72-62 nga kadaugan batok sa Cebu Institute of Technology-University (CIT-U) Wildcats  niadtong Domingo pinaagi sa sagunson nga singko puntos ni Kiefer Lim nga maoy nakabuak sa 58 nga panagtabla  ngadto sa 63-58 sa daginutong oras sa duwa.

Ning higayona, may hinagiban na ang Warriors kon  unsaon nila  pagpilde ang Webmasters, kinsa adunay 2-1 nga baraha.

Tungod sa mas maayong line-up, dayag na lang ang Warriors maoy mas paborito itandi sa UC sa ilang duwa karon. (BANAT NEWS)