Nacua mituok ni Carrere

CEBU, Philippines- Nalabngan ni Cebuano mixed martial artist Lando ‘Alamid’ Nacua sa Yaw-Yan Cebu ArDigma ang giisip niyang labing lisud nga sangka sa iyang karera dihang iyang gipilde pinaagi sa rear naked choke ang lig-ong French fighter nga si Paul ‘The French’ Carrere sa main event sa Cebu Extreme Fight League:The Beginning niadtong miaging gabii didto sa Cebu Coliseum.

Mipakita og hait nga striking skills si Carrere nga milisud-lisud ni Nacua, apan ang Cebuano fighter namawi sa ground game aron madakpan og matuok ang French sa 3:20 sa third round.

Ang 24-anyos nga si Nacua kapila milambos ni Carrere sa ring, apan ang French fighter mipakita og kaisug diin iya usab nga gihilam-osan og mga patid ug tuhod sa nawung si Nacua.

Wala mulubad si Nacua og pabilin siya nga nangita og paagi aron madala sa ground si Carrere ug milampos siya dungan sa paglampos pagtuok sa French fighter.

“Kahibaw ko lig-on siya (Carrere), pero wa ko magdahum nga ingun ato siya ka lig-on,” matud pa ni Nacua. “Ako lang gyud gisunod akong game plan ug gi-presyur nako siya. Nagpasalamat ko sa Ginoo sa iyang gihatag nga kusug.”

Sa supporting main event, si Roy ‘Agilon’ Bajar saYaw-Yan Simaron MMA migamit sa iyang kaalam sa Brazilian Jiu-jitsu aron makuha ang sikit nga unanimous decision nga kadaugan batok sa knockout artist nga si Nino ‘Tatus’ Saoy sa Tatus Muay Thai.

Mipaigo og mga patid sa ulo si Saoy ngadto ni Bajar, apan ang nauwahi kalmado nga mimaneho sa ground aron makontrolar ang tibuok away.

Gawas ni Nacua ug Bajar, laing pito ka mga Yaw-Yan fighters ubos sa giya ni Yaw-Yan ArDigma CEO and Founder Master Benigno ‘Ekin’ R. Caniga, ang midaog sa tagsa-tagsa nila ka mga sangka.

Ang registered nurse nga si Angel ‘Lawin’ Sanchez, nanginahanglan lang og 43 segundos aron mapukan si Bridgette ‘Rising Warrior’ Torbiso sa Durex Dragon KBC sa women’s division,  samtang ang  10-anyos nga si Ken ‘Simaron’ Caniga mikulata sa first round ni Benedict ‘Little’ Torbiso.

Si Earl ‘Texas’ Surigao mipaundang ni Bryan ‘Heat’ Otida sa Arcomjukai, Ran-Ran ‘Tirador’ Lugo milatos ni Etan ‘Loverboy’ Badayos sa Warrior MMA, Rexan ‘Matador’ Colong mimakmak ni Paulo ‘Goodboy’ Rinen sa Tatus Muay Thai, Joed ‘Agila’ Bulotano midemolis ni Ronelio ‘Brave’ Calasang sa second round, samtang si Jed ‘Buhawi’ Alvarez midaog batok ni Kirk ‘Pipebomb’ Andam sa Cebu MMA. (BANAT NEWS)