Youth Olympics Games: Matamlay ang simula ng Phl
NANJING, China - Gumawa ng personal best si swimmer Roxanne Yu habang nalagay sa ika-32nd place ang triathlete na si Vicky Deldio para sa ‘di magandang panimula ng Pilipinas sa pangalawang Youth Olympic Games kahapon dito.
Sa Nanjing Olympic Center lumangoy si Yu sa 100-m backstroke at naorasan siya ng isang minuto at 5:16 segundo para lumapag sa ika-26th puwesto sa 33 na sumali.
Hindi nakapasok sa finals ang 16-anyos na si Yu pero may ngiti sa kanyang labi dahil mas mabilis ang kanyang langoy sa dating best time na 1:05.20.
Sa kabilang banda, si Deldio ay sumalang sa 750-m swim, 20-km bike at 5-km run triathlon course sa Xuanwu Lake at naorasan ang tubong Olongapo ng 1:14:07 segundo sa splits na 13:08 sa swim, 37:11 sa bike at 22:26 sa run.
Wala namang umasa na mananalo ang dalawang lady athletes dahil tunay na malakas ang mga kalaban at ang nanguna sa heat ni Yu na si Eleni Anna Koutsoveli ng Greece ay may 1:03.48 habang ang nanalo ng ginto sa triathlon na si Britanny Dutton ng Australia ay may 59:56 oras.
Babalik pa sa pool si Yu sa Martes para sa 200-meter backstroke habang pahinga na si Deldio.
Si Ava Loreign Verdeflor ang sasalang para sa bansa sa Lunes sa artistic gymnastics sa Olympic Center habang sa Miyerkules ay lalaro si Zion Rose Nelson sa 400-m heats.
- Latest
