Record alang sa UV Baby Lancers
CEBU, Philippines - Gipanit-panitan sa mangtas nga University of the Visayas (UV) Baby Lancers ang Don Bosco Technology Center (DBTC) Junior Greywolves aron mokulit og record win, 142-36 sa juniors division sa 14th Cebu Schools Athletic Foundation, Inc. (CESAFI) kagabii diha sa Cebu Coliseum.
Usa kini ka rekord alang sa UV tungod kay ilang gisirohan ang DBTC sa first quarter, 29-0 nga wala pa mahitabo sa CESAFI o bisan sa laing mga liga dinhi sa Pilipinas.
Misamot pa gyud og burot ang labaw sa Baby Lancers sa halftime, 52-10. Ang UV nga walay katagbawan padayong mimakmak sa DBTC ug miposte kini’g 99-22 sa wala pa moiskor og 100-24 sa sayong bahin sa final period.
Gawas sa hugot nga depensa, nangigo sab og maayo ang Baby Lancers. Maglisud ang Greywolves paglabang sa bola sa center line kay mailog sa abtik nga Baby Lancers ang ilang mga pasa.
Si Orlan Wamar maoy topscorer sa Baby Lancers sa iyang 27 puntos. Si John Carlo Escalona miamot og 23 puntos, samtang si Theo Joshua Flores mitampo’g 22 puntos.
Pulos sab miiskor og double figures silang Ramish Alforque, Raul Jancork Cabahug, Dominic John Morre ug Dove Jones Verano.
Bugtong si Mark Anthony John Agustinez lang maoy nakahimo’g double figures alang sa DBTC pinaagi sa iyang 12 puntos.
PUNTOS MATAG USA
UV (142) – Wamar 27, Escalona 23, Flores 22, Cabahug 15, Morre 12, Verano 10, Padilla 3, Borbon 2, Cabanero 2, Loreto 2, Schaub 2.
DBTC (36) – Agustinez 12, Asignar 8, Dela Torre 3, Gabisay 3, Adlawan 3, Falcon 2, Doque 2, Laruber 1.
- Latest
