UV makigtakus sa SWU

CEBU, Philippines - Mortal nga karibal nga defending champion University of the Visayas (UV) Green Lancers ug Southwestern University (SWU) Cobras nga maoy  nagsangka sa finals sa miaging tuig ang magtakus sa labing unang higayon sa  pagpadayon sa 14th Cebu Schools Athletic  Foundation Inc. (CESAFI) basketball event karong adlawa diha sa Cebu Coliseum.

Ang UV-SWU showdown sugdan sa alas-6:45 sa gabii human sa secondary match tali sa UV Baby Lancers ug  Don Bosco Technology Center (DBTC) Greywolves sa alas-5:15 sa hapon.

Ang Green Lancers nga maoy defending champion nagbitbit og 1-2 nga baraha ug dakung misyon ang ilang pakigbatok sa Cobras tungod kay wala pa kini pilde sa tulo ka duwa.

Ang Lancers napilde ngadto sa Cebu Institute of Technology-University (CIT-U) Wildcats sa ilang season-opener. Nidaog sila sa University of Cebu (UC) Webmasters, apan nasugamak sab ngadto sa University of San  Carlos  (USC) Warriors sa overtime. Ang kapildihan maoy mitunol sa 11-time champion ngadto sa labing ngil-ad nilang 1-2 start sa ilang kasaysayan.  

Diha’y pipila ka tuig nga wala gyud makatilaw og pilde ang Lancers kansang winning run milanat ngadto sa 63  ka sagunson ka higayon sa wala pa kini maputol sa University of Cebu (UC) Webmasters sa tuig 2005.

Sa final sa miaging tuig,  ang Lancers mipatigbabaw dihang ilang gipilde ang Cobras sa tulo ka sunod-sunod nga higayon aron mokulit og kasaysayan isip labing unang team sa 13 ka tuig nga CESAFI nga nakabangon gikan sa 0-2 series nga biya.

Apan milabay na kadto. Ang pangutana, duna ba kahay laing rekord nga mahitabo karong tuiga?

Wala man tuod kanila si kanhi MVP Hernal ‘Wowie’ Escocio ug Arvie Cabanero, apan nasayod ang Lancers nga duna pay paglaum uban sa ilang mga rookies.  Manghinaut sab ang Lancers  nga mangigo silang John Michael Abad, Chris Yonnel Perolino, Rhaffy Octobre ug Francisco Arong.

Hinuon, dili magpalupig ang Cobras kun import maoy hisgutan tungod kay ang tandem nilang Jean Marie Mpouma ug Jeff Aguara sa UV mas ubos og scoring production  itandi  nilang Landry Sanjo  ug  Bendley Valdor sa SWU. Anaa sab nila  ang bigmen sa Cobras nga naglakip nilang Daryl Goloran ug  Bernie Bregondo. (BANAT NEWS)