Wildcats batok Jaguars

CEBU, Philippines - Naglaraw na sab ang  Cebu Institute of Technology-University (CIT-U) Wildcats nga mosungkab og daog sa gikatakda nilang duwa batok sa University of San Jose-Recoletos (USJ-R) Jaguars sa pagpadayon sa 14th Cebu Schools Athletic Foundation Inc. (CESAFI) basketball event karong adlawa diha sa Cebu Coliseum.

 Ang Wildcats nga nagpanilap sa ilang ikatulong daog makigsangka sa Jaguars sa alas- 6:45 sa gabii, human sa duwa tali sa CIT-U Wildkittens batok sa Cebu Eastern College (CEC)  Dragons nga sugdan sa alas-5:15 sa hapon.  

Dili sab tingali kini sayon alang kanila kay ang gutom nga Jaguars buot sab nga motilaw og daog.  Ang  Jaguars  wala makasustenir ug napilde sa Southwestern University (SWU) Cobras  niadtong Domingo, 60-65 bisan pa sa ilang grabeng paningkamot.

Sa ilang duwa karon, mas nakapabor  ang Jaguars ug posibleng makatilaw na kini’g daog tungod kay aduna man sila’y re-enforcement, samtang walay import  ang Wildcats.

Ang Wildcats usa sa duha ka collegiate teams nga wala mokuha’g import. Ang laing usa mao  ang University of Cebu (UC) Webmasters.

Ang Wildcats, kinsa nagtangag og 2-1 nga baraha  makasalig sa ilang triumvirate nga gilangkuban sa bag-ong CESAFI scoring sensation nga si Joshua Dela Cerna, guard Franklyn Batiquin ug ang comebacking gunner nga si Allan Dimco.

Sa higayon nga modaog ang Wildcats, mabuak nila ang ilang rekord sa miaging tuig nga 2-4 sulod sa unom ka duwa.

Si Quentin Luzoladio, ang nipis apan defensive import, masuwayan na gyud sa iyang abilidad sa opensa karong gabii diin naghatag siya’g bentaha sa Jaguars sa ilawom  tungod  sa iyang gitas-on.

Ang ilang singko puntos nga kapildihan sa Cobras maoy usa ka ehemplo nga andam na ang Jaguars mokulit og daog.

Ang Jaguars  mosandig  nilang Luzoladio, sweet-shooting guard James Regalado ug rookie bigman Kevin Villafranca. (BANAT PALARO)