Altas magsosolo sa No. 3 vs Knights
Laro Ngayon
(The Arena, San Juan)
12 nn. Letran vs Perpetual Help (Jrs/Srs)
MANILA, Philippines - Magkaroon ng malakas na pagtatapos sa first round ang hanap ng Perpetual Help Atlas at magsisimula ito ngayon sa pagsukat sa Letran, Knights sa 90th NCAA men’s basketball ngayong hapon sa The Arena sa San Juan City.
Ang natatanging laro sa seniors ay magsisimula sa ganap na alas-2:30 ng hapon at pagtatangkaan ng Altas ang makabalikwas agad mula sa 75-77 pagkatalo sa nagdedepensang kampeong San Beda Red Lions.
Ito na ang ikatlong pagkatalo sa huling apat na laro ng tropa ni coach Aric Del Rosario matapos buksan ang kampanya bitbit ang tatlong dikit na panalo para malagay sa ikaapat na puwesto kasalo ang St. Benilde Blazers.
Sina Juneric Baloria, Earl Scottie Thompson at Harold Arboleda ang magtutulung-tulong para pabagsakin ang Knights na sa 2-5 karta ay nangangailangan na maipanalo ang huling dalawang laro para gumanda ang puwesto sa standings.
Ang huling laro ng Altas ay laban sa nagpapasikat na Blazers habang ang Red Lions ang katunggali ng Letran sa huling asignatura sa unang ikutan. (AT)
- Latest
