Boyose misakmit sa ABF title
CEBU, Philippines- Gipakita sa Cebuano nga si Ardie Boyose Singwangcha ang iyang talagsaong kusug human niya gipatumba sa ikaduhang higayun si Richard Betos sa wala pa niya kini hingpit nga gipaundang sa second round aron masakmit ang Asian Boxing Federation super featherweight belt didto sa Tabunok Sports Complex sa Talisay City.
Gilatos dayun ni Boyose Singwangcha og kinumo si Betos sa unang round diin nahagsa og kaduha si Betos. Hinuon gipakita sa taga-Butuan City nga si Betos ang iyang kaigos human siya mibarug og ipadayun ang away.
Apan pag-abot sa ikaduhang round, hingpit nga gitapos ni Singwangcha si Betos human siya mipatugpa og usa ka kusug nga left hook sa lawas nga mipalup-og sa Mindanao fighter sa 1:46 sa maong round.
Ang pambato sa Noy Pacing Flores Boxing Gym nga si Boyose Singwangcha mipalambo sa iyang record ngadto sa 12-0, 8KOs.
Gawas ni Ardie Boyose, laing mga boksidor ni Thai boxing patron Naris Singwangcha nga midaog naglakip nila ni Neil John Tabanao Singwangcha ug Canoy Singwancha.
Si Tabanao mikulata ni John Gemino, samtang si Canoy milupig sa puntos ni JR Salvador.
Mukumpleto sa lista sa mga midaog mao sila si Kenny Demecillo batok Rogen Flores of Dipolog, Elias Joaquino batok Gary Rojo, samtang Fritz Cabilla batok Honorato Boc . (BANAT NEWS)
- Latest
