Boyose moaway karon alang sa ABF title
CEBU, Philippines - Sugdan ni undefeated Cebuano boxer Boyose A. Singwangcha ang pagtuman sa iyang damgo nga mahimong sikat nga boksingero pinaagi sa pagsakmit sa Asian Boxing Federation super featherweight title batok ni Richard Betos sa Butuan City sa usa ka 12-round showdown.
Si Singwangcha ug Betos magharong sa main event sa Naris/Wakee Promotions fight card karong gabii didto sa Tabunok Sports Complex sa Talisay City.
Si Singwangcha nga walay pilde sa iyang 10 ka professional fights maoy inilog, apan dili usab basta-basta ang beteranong si Betos tungod sa iyang rekord nga 20-8, 7KOs.
Ang lumad nga taga-San Remigio nga si Singwangcha lab-as pa sa iyang first round KO nga kadaugan batok ni Elmer Colve niadtong Mayo 1 didto sa Zamboanga Del Sur.
Sa supporting bouts, laing duha ka boksidor nga gisuportahan ni Thai boxing patron Naris Singwangcha nga si Tabanao Singwangcha makigharong ni John Gemino, samtang si Canoy Singwangcha moharong ni JR Salvador.
Mokompleto sa fight card mao ang sangka nila ni Kenny Demecillo batok Rogen Flores, Katiandagho S. Singwangcha batok Rodel Wenceslao, Elias Joaquino batok Robert Awitin ug Melmark Dignos batok Albert Mering .
- Latest
