19th Milo little Olympics sugdan na
CEBU, Philippines - Kapin sa 6,000 ka atleta ug opisyales gikan sa nagkadaiyang tunghaan sa Kabisay-an ang maghugop sa Cebu City Sports Center karong adlawa sa pormal nga pagbukas sa 19th Milo Little Olympics.
Sa kapin sa sayes mil ka atleta, 3,462 gikan sa secondarya ug 2,729 gikan sa elementarya.Adunay 127 ka tunghaan sa elementary ug 115 sa secondary ang mosalmot niining tuiga. Ang tinuig nga regional qualifying sporting event nga gipasiugdahan sa Nestle Phils., gilusad kagahapon atol sa press conference nga gitambongan sa mga kadagkuan sa Milo.
Sama sa nangaging mga edisyon, bagang duot sa mga atleta ang magagikan sa Sugbu ug ingon man sab ang “out-of-town” teams sama sa Iloilo, Bacolod, Dumaguete ug Negros Oriental.
Giklaro ni Milo Visayas leg organizer Ricky Ballesteros nga gilimitahan nila ang numero sa mga public school teams nga mosalmot ug mas gihatagan nila og prayoridad ang private school athletes.
“As the standard rises, public schools have become a bit fewer this time. We want to make sure that the competition will be very competitive,” matud pa ni Ballesteros atol sa press conference kagahapon didto sa Cebu City Sports Center.
Sa dili pa ang tournament proper, magpili una og “Miss Milo Little Olympics 2014 sa elementary ug secondary ug sundan dayon sa cheerdance competition.
Gawas sa kompetisyon, si Ballesteros naglaum nga ang regional elimination mahimong paagi aron makaporma og solidong koponan nga maoy morepresentar sa Team Visayas sa Milo National Olympics sa Oktubre didto sa Marikina City.
Mga sporting events nga tigian naglakip sa athletics, badminton, basketball, chess, football, gymnastics, tennis, sepak takraw, scrabble, swimming, table tennis, taekwondo ug volleyball. (BANAT NEWS)
- Latest
