Singwangcha adunay bag-ong kontra

CEBU, Philippines - Adunay bag-ong kontra si super featherweight prospect nga si Boyose A. Singwangcha  sa iyang away sa main event sa laing dakung boxing card nga gipasiugdahan sa Naris/Wakee Promotions sa Agosto 2 diha sa Tabunok Sports Complex sa Talisay City.

Ang garbo sa San Remigio, Cebu nga si Singwangcha, makigsangka unta ni Nino Val Falcunaya sa Lipa City, Batangas sa gikatakda nilang 12 ka hugna nga duwelo alang sa Asian Boxing Federation championship, apan miatras sa maong away si Falcunaya tungod sa  injury  nga naangkon atol sa aksidente dili pa dugay.

Gumikan niini, si Singwangcha moharong na karon ni Richard Betos sa Butuan City, ang kanhi  WBC Asian Boxing Council super bantamweight champion. Iyang nakuha ang interim WBC Asian Boxing Council super bantamweight title pinaagi sa fourth round stoppage ni Thai Petchnamnung  Sithsaithong duha na ka tuig ang milabay didto sa Father Saturnino Urios University Gym sa Butuan City.

Ang 28-anyos nga si Betos nagbitbit og 20-8-1 win-loss-draw ug adunay 8KOs. Sa iyang bahin, si Singwangcha, nga naila isip Ardie Boyose sa wala pa siya motapon uban ni Thai boxing patron Naris Singwangcha, adunay 11-0 nga rekord, gilamasan og pito ka knockouts.  Gipaundang niya ang katapusan niyang unom ka kontra sud lang sa duha ka hugna, ang  labing bag-o mao ang pagpahagba sud lang sa usa ka hugna ni Elmer Colve niadtong Mayo didto sa Saint Joseph College of  Sindangan Gymnasium sa Sindangan, Zamboanga del Norte. (BANAT NEWS)