R.A. Essentials nimasaker sa Tanc-Fer
CEBU, Philippines - Walay kukaluoy nga gilubong sa R.A. Essentials-Bastida ang Tanc-Fer Eagles, 107-84 sa As-Es B.A.R. 2nd Conference basketball tournament Fiesta Cup 2014 niadtong Lunes sa gabii diha sa Benjamin Solon Memorial Gym sa barangay Cogon-Ramos, ning siyudad.
Gipamatud-an ni Louie Tanggol ang iyang katakus diin mipabuto siya'g 22 puntos aron iyang mapangulohan ang R.A. Essentials nga miiskor dayon og daog sa una nilang duwa sa tinuig nga torneyo.
Misuporta sab sa opensa silang Sambag 1 Brgy. Capt. Lemar Alcover ug kanhi Cebu Doctors' University (CDU) White Stallions Rocky Bacalso nga parehong mihabwa og 16 puntos, samtang ang kanhi CSAT Builders nga si Reynolds Zamora ug Mico Llagas mitusak og 14 puntos matag usa alang sa maong kadaugan.
Si Vergel Fuentes mao usab ang nangu sa napildeng Tanc-Fer pinaagi sa iyang 16 puntos, gisundan ni Bart Sanchez nga adunay 13 puntos. Sila si Allan Jaime ug Glen Misa mitikdol og 12 puntos matag usa ug si Arjohn Colinares mitimbre'g 10 puntos, apan kuwang ang ilang mga paningkamot sa hinapos nga bahin sa duwa hinungdan sa ilang kapildihan.
PUNTOS MATAG USA
R.A. ESSENTIALS (107) – Tanggol 22, Alcover 16, Bacalso 16, Zamora 14, Llagas 14, Lanutan 8, Pada 7, Aniñon 4, Rodriguez 2, Bastida 2, Godiz 2.
TANC-FER (84) – Fuentes 16, Sanchez 13, Jaime 12, Misa 12, Colinares 10, Llanos 7, Diliña 4, Rafols 4, Saballa 2, Tancio 2, Donaire 2. (BANAT PALARO)
- Latest
