Premyo sa Sogod triathlon gipadak-an
CEBU, Philippines - Gipadak-an sa kadagkoan sa Sogod ubos sa liderato ni Mayor Moonyeen Durano-Streegan ang ganting salapi alang sa ikaupat nga edisyon sa ilang tinuig nga triathlon event nga gikatakda karong Domingo didto sa Alegre Beach Resort.
Ang overall champion sa men ug women's division mobulsa og P7,000, samtang ang ikaduha ug ikatulo makadawat og P5,000 ug P3,000 matag usa.
Ang kalihukan naglatid sa sprint ug mini-sprint distances. Ang sprint mokober og 1K swim, 30K bike ug 7.5K run, samtang ang mini-sprint gituyo alang sa mga triathletes nga nagpangedaron og 13-15 ug 16-above age groups.
Sa registration fee nga P800, ang mga entrante makadawat og libreng event shirt ug brunch.
Ang entry forms mahimong makuha sa Rudy Project Concept Stores sa Ayala ug SM, Speedo Ayala ug SM ug sa The Brick Tri Shop.
Ang mga partisipante may kahigayonan sab nga modaog og gift certificates (overnight stay) sa Alegre Beach Resort and Spa ug laing gift items sa raffle atol sa awarding ceremony. (BANAT PALARO)
- Latest
