Final meeting sa Sibonga Mayor's Cup himuon karong gabii

CEBU, Philippines - Ipahigayon karong gabii ang final meeting alang sa 7th Sibonga Mayor's Cup basketball tournament nga gikatakda sa Hulyo 11-27 didto sa Richie Bacaltos Sports Complex.  

Ang meeting nga pagatambongan mismo ni Sibonga Mayor Lionel Bacaltos adto ipahigayon sa D' Port Resto sa Waterfront Cebu City Hotel and Casino

Sa initial meeting  niadtong Biyernes sa gabii,  si  Bacaltos miingon nga gusto  nilang paduwaon ang CESAFI champion University of the Visayas (UV) Green Lancers, Southwestern University (SWU) Cobras, University of San Carlos (USC) Warriors ug University of San Jose-Recoletos (USJ-R) Jaguars, apan wala pa siya makadawat og kompirmasyon gikan sa  nahisgutang mga tunghaan.

Matud pa ni councilor Bebe Bugtai, ang tsirman sa Sibonga Sports Council, nga  kundili moduwa sa maong torneyo ang upat ka koponan,  himuon na lang kini nilang exhibition games, apan magtangag gihapon kini og premyo.

Suwayan sab nila pagdapit ang Cebu Institute of Technology-University (CIT-U) Wildcats ug ang University of Cebu (UC) Webmasters.

Sa laing bahin,  adunay unom ka commercial teams  ang mipadayag sa ilang partisipasyon ug kini naglakip sa Autolab, Orica Mining Company, AC Troopers, Young Construction, RMA ug Drailers-UC.

Mitambong sab sa initial meeting silang Sibonga councilors Dotis Laude, Tommy Codilla ug Loloy Uytico ug ingon man si Sibonga tournament commissioner Boy Murillo. (BANAT NEWS)