Topseed teams nakakuha'g bentaha

CEBU, Philippines - Ang barangays Gabi,  San Miguel, Catarman ug Buagsong nga maoy topseed sa tagsa-tagsa nila ka bracket  makaangkon og "twice-to-beat" advantage batok sa second seeded teams sa quarterfinals sa Cordova Inter-Barangay basketball tournament juniors division didto sa Cordova Sports Complex.

Ang Gabi nga maoy no. 1 sa bracket A makigsangka sa Pilipog, ang no. 2 sa bracket B,  ang San Miguel (B1) makigharong sa Ibabao Jeans (A2), ang Catarman (C1) makigbatok sa Bangbang (D2) ug ang Buagsong (D1) makigtigi sa Day-as (C2).

Human sa quarterfinals, magbagat  ang top four teams sa semifinals diin ang modaog maoy mag-abot sa finals.

Sa laing bahin, natapos na sab ang elimination round sa Inter-Commercial ubos  sa Bracket B.

Miabante ngadto sa semifinals  ang ED' View, GMC ug ang San Remigio Beach Club, kinsa nalambigit sa triple-tie.

Ang ED' View  maoy nakakuha sa labing taas nga quotient sa 1.0395, gisundan sa GMC  nga adunay quotient nga 1.0057 ug sa San Remigio Beach Club sa ilang 0.9562.

Mag-ilog sa katapusang luna ang Sports City ug Julie's Bakeshop.

Si Basketball Association of Cordova (BAC) commissioner Boy Allan Lataza miingon nga ang semifinals ipahigayon karong Hulyo 8.  

Ang  torneyo gipasiugdahan ni BAC president ug Cordova municipal councilor Roque Yburan, kinsa mao sab ang chairman sa Cordova Sports Commission. (BANAT PALARO)