Rama mikawat salida sa TESDA 'shoot for your dreams'

CEBU, Philippines - Mikawat og salida si Cebu City Mayor Mike Rama dihang miposa siya'g 10 ka three-pointers alang sa Team Specialista, apan misipyat siya sa iyang katapusang three-pointer nga maghatod unta sa ilang exhibition game ngadto sa 98-all stalemate batok sa Team Trabaho  niadtong Huwebes sa gabii didto sa Cebu Coliseum.

Giuloha'g "Shoot for your Dreams" ang Team Trabaho nga gilangkuban sa Manila PBA Legends miiskor og 98-95 nga kadaugan batok sa Team Specialista nga gilangkuban sa tulo ka Sugbuanong ex-PBA cagers nga silang Bonel Balingit, Roel Gomez, ang head coach sa University of Cebu (UC) Webmasters ug Felix 'Donbel' Belano nga karon head coach sa University of the Visayas (UV) Green Lancers.

Naglabaw ang Team Specialista og 12 puntos, 87-75 human sa three-pointer ni  Rama ug mitubo kini ngadto sa 90-81, apan ang Team Trabaho milusad og 9-0 run aron tablahon ang duwa, 90-all

Si Kenneth Duremdes, kinsa mao na karon ang head coach sa  Adamson University Falcons sa umaabot UAAP season, maoy naghatag sa Team Trabaho og 98-93 nga labaw sa katapusang minuto sa duwa.

Ang Team Trabaho maoy adunay ball possession sa nahibiling pipila ka segundos, apan samtang diha na ni Duremdes ang bola wala siya mohimo'g attempt,  iya hinuon kining gilabay ngadto ni Rama, kinsa nagpabilin sa pikas korte. Si Rama adunay 39 puntos  mitira og three-pointer, apan misipyat kini dungan sab sa paghugyaw sa mga fans sulod sa coliseum.

Misamot paghugyaw ang katawhan dihang giduwa-duwaan sa higanteng si Bonel Balingit ang mga gagmay'ng nagdepensa kaniya ug  ipaibog  niya ang bola sa dili pa kini ipasa sa iyang kauban.         Sa pikas nga team, gilingaw sab sa laing 6-foot-9 nga si Marlou Aquino ang katawhan ug igo lang  kintohan ang iyang mga kaatbang.

Si Cebu First District Representative Samsam Gullas maoy laing player sa Specialista nga miiskor og double figures pinaagi sa iyang 12 puntos. Posible pa untang lahi ang dagan sa duwa kun niduwa pa sa Team Specialista si Ramon 'El Presidente' Fernandez. Ang    PBA four-time MVP nga si Fernandez igo lang misaksi sa duwa uban sa iyang asawa nga si Karla Kintanar Fernandez, ang station manager sa TV5-Radyo Singko.

Si TESDA Director-General  Joel Villanueva  mikawat sab og salida human moiskor sa unang siyete puntos sa Team Trabaho pinaagi sa usa ka acrobatic lay-up, dayon  miposa og  "back-to-back" triples. Igo lang siya niduwa sa first period human makasinati og leg cramps.

Ang Team Trabaho gibitoonan sab sa mga sakop sa local media gikan sa nagkalain-laing outlets.

PUNTOS MATAG USA

Team Trabaho (98) – Duremdes 23, Santos 13, Aquino 12, Villanueva 10, Panerio 8, David 6, Jose 6, Codiñera 4, Villaruel 3, Cordova 2, Solon 2, Cabido 2.

Team Specialista (95)  – M. Rama 39, Gullas 12, Auditor 8, Balingit 4, Soco 4, Gayona 4, Monteron 4, Rabaya 4, Ponce 4, S. Gomez 2, Dennison 2, Santos 2.