Duncan pabiling moduwa sa Spurs

CEBU, Philippines - Magpabilin pa gihapon si Tim Duncan sa San Antonio  Spurs ug moduwa kini sa    2014-2015 season aron tabangan ang koponan alang sa ilang ikaunom nga  NBA title.

Gumikan niini, gipapas ni Duncan ang mga pagduda sa mga NBA fans.

Wala pa hinuon moluwat og opisyal nga pamahayag si Duncan, apan ang suod niyang mga higala mibutyag nga walay plano si Duncan nga moretiro human modaog ang Spurs sa NBA Finals batok sa Miami Heat.

Gamiton ni Duncan ang iyang final-year option sa iyang kontrata tungod kay matud pa, nalingaw kaayo siya uban sa iyang mga teammates ug ingon man sa mga coaches.

Nakahukom si Duncan nga gamiton ang iyang option sa iyang kontrata alang sa 2014-2015 season aron mobalik og duwa.

Si Duncan maoy kanhi No. 1 overall draft sa tuig 1997 ug siya sab ang nag-una sa tanang mga NBA players sa listahan sa mga daog.  Mihipos siya og duha ka MVP awards ug tulo ka NBA Finals MVPs.

Si Duncan modawat og $10.3 million sa sunod season sa katapusang tuig sa iyang kontrata.

Sa edad nga 38-anyos, si Duncan wala mipakita'g paglubad dihang mi-average siya og 15.1 points, 9.7 rebounds ug 1.9 block sa miaging season.

Sa hukom ni Duncan, nanghinaut ang mga fans sa Spurs nga madani usab ang ubang mga beterano sa koponan nga dili una moretiro sama sa 37-anyos nga si Argentinian superstar  Manu Ginobili.

Maisip nga epektibo ang mga veteran players sa Spurs ug matawag gihapon sila nga contender sunod tuig ilabi na sa mga sumusulbong nilang mga batan-ong key players nga naglakip sa finals MVP nga si Kawhi Leonard. (BANAT NEWS)