PBA greats, media dribblers makigduwa sa TESDA
CEBU, Philippines - Pipila ka mga sakop sa local media makahigayon na og duwa uban sa ilang mga kanhi idolo sa Philippine Basketball Association dihang ang PBA Legends gikan sa Manila ug ingon man dinhi sa Sugbu mopahigayon og exhibition game sa Hunyo 26 diha sa Cebu Coliseum.
Ang duwa gitakda sa alas-5 sa hapon.
Giuloha'g "Shoot for your Dreams" ang exhibition game libre sa publiko ug kabahin kini sa social media ug advocacy activities sa Technical Education and Skills Development Authority (TESDA) programs and services.
Ning bag-o, susamang kalihukan ang gipahigayon sa Davao City diin nakadani kini'g daghang mga fans.
Ang TESDA Secretary nga si Joel Villanueva, kinsa niduwa kaniadto sa University of Sto. Tomas (UST) junior varsity, mopakita'g aksiyon uban sa PBA greats sama nilang Alvin Patrimonio, Kenneth Duremdes, Bal David, Jerry Codinera, Bobby Jose, Rodney Santos ug Marlou Aquino. Makig-uban sila sa Cebu media nga silang The Freeman sports editor Manny Villaruel, Edri Aznar sa Sun Star, Taborada sa TV5-Radyo Singko, Teodorico 'Jun' Solon sa GMA-7, Edgar Escalante sa ABS-CBN ug silang Calvin Cordova ug Jonas Panerio sa Cebu Daily News.
Ilang sangkaon ang TESDA-7 Specialista graduates, kinsa makig-uban nilang Congressmen Samsam Gullas ug Bebot Abellanosa, businessman Glenn Soco ug ubang Cebuano ex-PBA players Elmer 'Boy' Cabahug, Al Solis, Tata Merced, Gilbert Demape, Felix 'Donbel' Belano ug Junthy Valenzuela.
Dunay press conference uban ni Sec. Villanueva ug sa iyang team didto sa Cebu Coliseum pipila ka oras sa dili pa ang duwa.
Adunay gibana-bana nga 250 ka mga TESDA Specialista graduates ang pormal nga pasidunggan atol sa maong duwa. (BANAT NEWS)
- Latest
