Cebuano Riders moasdang sa dinagat

CEBU, Philippines - Moasdang na ugma sa  Dinagat  Island sa  Surigao ang 20 ka mga bantugang Sugbuanong riders  aron  adto  ipabuhagay  ang ilang katakus sa fourth leg sa 2014 MS Motosuit Motocross Series nga gikatakda sa Hunyo 18.

Matud pa ni MS Motosuit big boss Lou Ornopia nga sila si Jon-jon Adlawan, Jubenile Abellar ug John Flores maoy mangu sa mga tang-ang riders gikan sa Sugbu ning usa ka adlaw nga kompetisyon nga uloha'g "1st Dinagat Island Motocross Challenge."

Ang mga koponan sa Danao, Quickflight ug PowerSports Racing ang mopakita sab sa ilang abilidad  ning kulbahinam nga lumba nga gipasiugdahan ni Benjie Ecleo uban sa lokal nga kagamhanan sa Dinagat.

Ilang sukdon ang abilidad sa first leg champion nga si Burnok Mangusong sa Davao, Dodon Yuson sa Iloilo, Wensor Famorca sa Guimaras ug pipila ka masaarong riders gikan sa Sel J Racing Team sa Manila.

Mga riders gikan sa Caburan, Digos, Kidapawan, Dipolog, Ozamiz, Calinan, Lanao, Cagayan de Oro, Gingoog, Montevista, Panabo, Mati, Tagum, Kapalong, Bukidnon ug Maguindanao ang mopakita sab og aksiyon ning maong lumba nga gikonsiderar isip labing daku nga sporting event nga gipahigayon sa amihang-sidlakan sa Surigao del Norte. (BANAT NEWS)