Omaña mohimo sa iyang MMA debut karon
CEBU, Philippines - Misaad og "knockout" nga kadaugan si former ALA Gym boxer Joseph 'Jomanz Omanz' Omaña sa iyang unang away sa Mixed Martial Arts (MMA) sa ipahigayong ONE Fighting Championship (ONE FC) fight card.
Si Omaña makigsangka ni Thai kickboxing legend Dejdamrong Sor Amnuavsirichoke karong gabii didto sa Jakarta, Indonesia.
"Tsansa na ni nako, kahibaw ko nga underdog ko pero ako ipakita nga sayop ilang pagtuo," matud pa sa Mandauehanon nga si Omaña.
"Striking gyud akong saligan, kahibaw ko maayo siya mamatid pero mas taas akong experience sa boxing nga maoy akong gamiton aron modaog," dugang pa niya.
Sa wala pa siya molayat sa MMA, si Omaña nagbilin og rekord nga 12-2, 6KOs sa boksing diin miduwa siya ubos sa nabantog nga ALA Boxing Gym.
Dili sayon ang misyon ni Omaña tungod kay si Amnuavsirchoke usa man ka two-time Muay Thai world champion ug usa sa mga elite fighter gikan sa Evolve Mixed Martial Arts, usa ka sikat nga MMA gym sa Singapore.
Gawas ni Omaña, laing duha ka Filipino MMA fighters ang moaway usab sa main card sa ONE FC: Era of Champions.
Ang pambato sa Team Lakay nga si Gege Eustaquio ug wushu fighter nga si Ruel Catalan moaway batok sa tagsa-tagsa nila ka mga langyaw'ng kaatbang. Harungon ni Eustaquio si Kentaro Watanabe sa Japan, samtang si Catalan makigsangka ni Gianni Subba sa Malaysia. (BANAT NEWS)
- Latest
