Adlawan misidlak sa 3rd leg MS Motosuit moto-x series

CEBU, Philippines -  Ang multi-titled nga si Jon-Jon Adlawan maoy nangulo sa mga mananaog atol sa third leg sa 2014 MS Motosuit Motocross Series nga giuloha'g "1st Toledo City Motocross Challenge" niadtong Lunes didto sa Looc II sa barangay Bato dakbayan sa Toledo.

 Ang Sugbuanong si Adlawan midaog og duha ka  korona pinaagi sa expert ug pro open categories. Iyang gipilde si Juvenille Abellar ug John  Flores sa duha ka dibisyon.

 Bisan pa niana, si Flores may ikapasigarbo sab dihang iyang giharian ang immediate open class. Sila si  Dongkey Sanchez ug JP Cuesta mi-okupar sa ikaduha ug ikatulo nga dapit.

 Mabungahon sab ang adlaw ni Jed Luna human siya midaog og tulo ka championship trophies pinaagi sa open enduro, beginners open production ug novice open production.

 Lain pang mga kampiyon sa tagsa-tagsa ka dibisyon mao sila si Dongkey Sanchez (local enduro), Roscel Gungob (executive  A ug B),   Nanding Pepito (executive C), Gyle Aguilar (mini class 85cc.), Lloyd Abrenica (mini class 65cc.), RK Cuesta (ladies class), Raiver Cabras (50cc special event) ug Belson Baculfo (underbone). (BANAT NEWS)