Duncan Ug James

CEBU, Philippines - Sud sa 10 ka season, usa lang ka player sa NBA ang adunay katugbang ni LeBron James kun mga daog sa duwa ang hisgutan ug kini walay lain si Tim Duncan.

Hangtod ning mga panahona halos usa ka dekada na ang milabay, daw dili katuohan nga susama ang mga numero nilang Duncan ug James..

Si Duncan nakaduwa na og 622 ka regular-season ug playoff victories, samtang si James may 621. Si Duncan dunay 50.2 percent field shooting ug si James may 50 percent field goal shooting.

Si Duncan midaog og duha ka championships uban sa San Antonio sud sa 10 ka tuig, samtang si James adunay duha ka titulo uban sa Miami.

Sa ilang head-to-head match-up sa NBA Finals, sila si Duncan ug James parehong adunay usa ka daog ug usa ka pilde.

Busa kining ilang pagbagat karon sa 2014 NBA Finals, magbuwag sila sa ilang dalan ug matawag kini nga usa ka tie-breaker.

Ang Spurs ni Duncan mitagak sa Oklahoma City Thunder sa West Finals sud sa unom ka duwa, samtang ang Heat ni James mitagak sab sa Indiana sa East Finals sud sab sa unom ka duwa.

Mao kini ang unang Finals rematch sa NBA sukad mahitabo ang sangka tali sa Chicago Bulls ug Utah Jazz sa tuig 1997 ug 1998.

Ang Spurs midaog og 62 ka duwa sa regular season, ang best record karon ug naglakip kini sa ilang 24 puntos nga kadaugan batok sa Miami didto sa AT&T Center nga maoy binyu sa Game-1 karong Biyernes.

Sayod ang Heat nga gusto gyud nga mobawos ang Spurs ug mao kini ang ilang gipangandaman og maayo. (BANAT NEWS)