Donaire bag-ong WBA featherweight champ

CEBU, Philippines - Nasakmit ni Filipino boxing star Nonito ‘The Filipino Flash’ Donaire ang WBA featherweight title batok ni South African Simpiwe Vetyeka, apan wa damha nga mahimong kontrobersyal ang maong away nga natapos pinaagi sa fourth round didto sa Macau.

Si Donaire midaog pinaagi sa unanimous technical decision human giundang og sayu ang away dihang mikusug ang agas sa dugo sa iyang nagisian nga kilay resulta sa head butt gikan ni Vetyeka.

Ang 31-anyos nga si Donaire klaro nga naglabaw sa puntos ilabi na dihang napatumba niya sa fourth round ang South African, apan dali ra usab nga nakabarug aron ipadayun unta ang away.

Human nahukman sa ring doctor nga undangon ang away, gitan-aw sa mga hurado kun asa gikan ang gisi sa kilay ug nakita nila nga gikan sa headbutt ug dili sa kumo ni Vetyeka ang gisi.

Tulo ka mga hurado ang pulos mihatag og 49-46 pabor ngadto ni Donaire kinsa nahimong five-division world champion.

Apan bisan sa maong kadaugan, si Donaire naguol tungod kay wala mahitabo ang iyang gusto nga usa ka impresibong kadaugan nga iya untang ihalad ngadto sa mga Pinoy.

“I’m sorry that I was unable to give you guys a proper fight,” matud pa ni Donaire atol sa post-fight interview.

Gipadayag usab ni Donaire nga andam siya nga hatagan og rematch si Vetyeka aron usab pamatud-an nga dili taghap iyang kadaugan batok sa kanhi South African champion.

“He’s (Vetyeka) a great fighter. He deserves a rematch,” matud pa ni Donaire sa The Philippine Star.

Si Donaire mipalambo sa iyang record ngadto sa 33-2, 21KOs, samtang si Vetyeka nahagsa ngadto sa 26-3, 16KOs. (BANAT NEWS)