Thunder Nakatabla

CEBU, Philippines - Gitabla sa Oklahoma City Thunder ang ilang "best-of-seven" series human modaog batok sa San Antonio Spurs, 105-92 sa Game-4 sa Western Conference Finals kagahapon didto sa Chesapeake Energy Arena sa Oklahoma City.

Walay laing mabasol ang San Antonio Spurs   mao ang kakuwang sa ilang ball movement ug cutting ug komunikasyon.

Ang Thunder ug Spurs nagtabla na karon sa series, 2-2.

Suwayan sa Spurs nga    makabentaha pag-usab dihang sila ang mo-host sa Game-5.

Ang modaog sa series maoy makakuha'g katungod sa pakigharong sa two-time defending champions Miami Heat o di ba sa Indiana Pacers alang sa NBA Finals.

Sila si Russell Westbrook ug Kevin Durant nagkumboya'g 71 puntos sa maong kadaugan.

Gipakita ni Russell Westbrook ang usa sa labing maayo niyang duwa isip pro diin miiskor siya'g 40 puntos  uban ang 10 ka assists, lima  ka steals ug lima sab ka rebounds.

Samtang ang MVP nga si Durant miabuno'g 31 puntos, milangkat og lima ka rebounds ug lima sab ka assists.

Nakahatag sab og dakung deperensiya ang pagduwa'g balik ni Serge Ibaka tungod sa iyang depensa sa ilawom  hinungdan nga naglisod ang Spurs pag-iskor sa undergoal.

Daghan kaayo'g usik ang Spurs diin nakahimo sila'g 13 ka turnovers batok sa Thunder nga adunay pito.

Ang point guard sa Spurs nga si  Tony Parker miiskor og 14 puntos, samtang ang laing two-thirds sa Spurs' "Big Three" nga silang Tim Duncan ug Manu Ginobili mitotal og 14 puntos sa 5-of-16 shooting.

Si Boris Diaw midugang og 14 puntos uban ang 10 ka rebounds alang sa  Spurs, kinsa mosuway pagbalik sa NBA Finals usa ka tuig human sila mapilde ngadto sa Miami sa Game-7 championship series.

Si Kawhi Leonard miiskor og unom sa iyang 10 puntos sa unang duha ka minutos sa duwa dihang ang Spurs miposte'g 8-0 nga bentaha. (BANAT NEWS)