Cebu kampiyon sa Coca Cola PBA Youngstars 2014 National Finals
CEBU, Philippines - Ang sumusulbong nga batan-ong player sa Team Cebu nga si Jifford Cahigas maoy nahimong bayani dihang miburak siya'g 36 puntos, ang 24 niini didto sa first half aron tabangan ang iyang team nga mokulit og 95-83 nga kadaugan batok sa Batangas og nasakmit sa mga Sugboanon ang titulo sa Coca Cola PBA Youngstars 2014 National Finals didto sa Manila.
Misaler sab ang opensa nilang Joshua Flores ug Orlan Wamar kinsa parehong miamot og double figures sa ilang 21 ug 17 puntos matag usa.
Sayo kaayong naglabaw ang Team Cebu kinsa nagsugod og 10-0 run ug ilang napakgang ang rally sa Batangas didto sa fourth quarter aron mosikit ngadto sa 77-82 may singko minutos ang nahibiling oras sa duwa.
Wala na tugoti sa Cebu ang Batangas nga mosikit pag-usab dihang migamit sila'g full court press.
Si Raprap Chavez maoy nangu sa Batangas sa iyang 34 puntos ug midugang si VJ Alarcon og 22 puntos.
Ang duha ka teams nakadawat sa ilang tagsa-tagsa ka tropeyo atol sa halftime sa duwa sa Barangay Ginebra batok sa Meralco Bolts sa PBA.
Sa miaging duha ka tuig, kanunay lang second placer ang Cebu ug niadtong 1st Coca Cola PBA Young stars diin napilde sila sa Rizal, Antipolo niadtong 2012 ug napilde sab batok sa Laguna sa 2013 season.
Kagahapon, naputol ang maong pagsul-ob sa gitawag og "bridesmaid" dress.
Si Flores maoy napiling MVP samtang nalakip si Cahigas sa Mythical Five nga gipangulohan ni Flores.
Si PBA Commissioner Chito Salud ug si Atty. Adel Tamano sa Coca Cola maoy mitunol sa tropeyo.
Puntos matag usa:
CEBU (95) --- Cahigas 36, Flores 21, Wamar 17, Zenarosa 9, Dado 5, Gonzaga 4, Canoy 3, Alforque 0, Dumandan 0, Igot 0, Maglasag 0, Padilla 0
BATANGAS 83 - Chavez 34, Alarcon 22, Oliva 15, Garcia 4, Macaraig 4, Hernandez 3, Dimayuga 1, Bathan 0, Encarnacion 0 , Igasan 0, Maranan 0
Quarters: 29-17; 55-40; 76-62; 95-83. (BANAT NEWS)
- Latest
