Borbon mo-host ms motocross
CEBU, Philippines - Ang second leg sa 2014 MS Motosuit Motocross Series moulbo karong Domingo didto sa barangay Logo, Borbon sa amihanang bahin sa Sugbu.
Giuloha'g "4th Mayor Butch Sepulveda Motocross Cup," ang usa ka adlaw nga lumba salmotan sa mga banggiitang riders dinhi sa nasud.
Kini naglakip nilang multi-titled Jonjon Adlawan, Burnok Mangusong, Dondon Yuson, Winsor Famorca, Ambo Yaparcon ug Vebil Abellar.
Matud pa ni event organizer Lou Ornopia nga pipila ka riders gikan sa Manila, Davao, Dumaguete City, Leyte ug Dinagat Island sa Surigao ang mopakita sa ilang katakus batok sa mga maayong laki sa Sugbu.
Ang mga kategoriya nga tigian naglakip sa mini 60cc. ug 85cc., beginners, local enduro, open enduro, executive A, B ug C, novice, intermediate, expert ug pro open.
Gipasiugdahan sab sa lokal nga kagamhanan sa lungsod sa Borbon, ang lumba gipaluyohan sab sa F&FO Motor Parts, JCO Motor Parts, Prospeed, Speed-up, Quick Flight, Motomaze, Keiz BJ Motors, Bradder Moto Access, RMO Motor Parts, NF Motor Parts, Aike Motor Parts, Ljun Motor Parts, Sanitech, Dr. Andy Uy, Jonathan Cuyos, Edwin Dilao, Ramon Montealto, Gitoy Ornopia ug Diosdado Navarez.
Human sa Borbon, ang series dad-on ngadto sa Toledo alang sa third leg sa Hunyo 2 ug dayon sa Dinagat Island alang sa fourth leg sa Hunyo 18.
Sa laing bahin, ang motocross action makita sa CCTN 47 matag adlaw'ng Sabado gikan sa alas-10:30 hangtod sa alas-11 sa buntag. Aduna kini replays matag Domingo gikan sa alas-10:30 hangtod sa alas-11 sa gabii.
Makita sa tunga sa oras nga pasundayag ang pagsugod sa Cebu motocross ug ingon man ang uban pang mga highlights sa tinuig nga MS Motosuit Motocross series. (BANAT NEWS)
- Latest
