Bogo chessfest karong weekend
CEBU, Philippines - Andam na ang tanan alang sa 7th Mayor Celestino E. Martinez Jr. Open Chess Tournament karong weekend didto sa Bogo City Plaza sa amihanang bahin sa Sugbu.
Mokabat ngadto sa P20,000 ang ganting salapi nga giandam nga itunol ngadto sa mga mananaog ning maong 7-round Swiss system competition.
Ang kampiyon sa open category mobulsa'g P5,000, ang second placers makadawat og P3,000, samtang ang third makaangkon og P1,000. Ang mo-okupar sa ikaupat makadawat og P500.
Makadawat sab og P300 matag usa ang mopahiluna gikan sa ikalima hangtod sa ikanapulo nga dapit.
Ang top three performers sa Bogo residents makadawat og P3,000, P2,000 ug P1,000.
Sa kiddie ug female category, ang top three gantihan og P500, P300 ug P200.
Ang kompetisyon adunay entry fee nga P200, apan ang mga residente sa Kuwatro Distrito sa Sugbu hatagan og 50 porsiyento nga diskuwento. Alang sa dugang mga pakisayod, mahimong mokontak ni Dr. Rodriguez sa 0915-8691127 o di ba ni FIDE arbiter Marvin Y. Ruelan sa 0926-7352951. (BANAT NEWS)
- Latest
