Ala Promotions nakakuha'g U.S. license

CEBU, Philippines - Laing dakung kalampusan ang nakab-ot  sa premyadong boxing promotion sa nasud, ang ALA Promotions kay  nakakuha na kini'g lisensya nga mo-promote og   boxing events didto sa Estados Unidos.

 Ang ALA Promotions maoy labing unang boxing promotional outfit sa Asia nga mopahigayon og boxing event sa US.

 Gisugdan sa ALA Promotions ang paglihok alang sa maong lisensya niadto pang tuig 2011 ug sa katapusan, ang California State Athletic Commission (CSAC) miaprobar sa ilang aplikasyon ug mihatag og pagtugot sa Cebu-based promotion.

 Si ALA Promotions President and CEO Michael Aldeguer mismo ang nakigkita ni CSAC executive officer Andy Foster aron dawaton ang lisensiya.

 Ang ALA dugay na nga nag-promote og mga boxing events sa nasud diin gibutang nila ang Pilipinas sa mapa sa boksing. Gisaka usab nila ang level sa boxing sa mga Filipino fighters pinaagi sa Pinoy Pride series.

 "Patience, hardwork and determination plus ALA Promotion's track record made it possible for Michael (Aldeguer) to finally get the license to promote in the US," matud pa ni ALA Boxing Promotions ug Gym founder Antonio L. Aldeguer.

 Sa maong kalamboan, ang Philippine boxing mosud sa eksena sa US diin gilauman nga mopakita sa ilang abilidad ang mga ALA fighters sama nila ni WBO light flyweight king Donnie’ Ahas' Nietes, Jason 'El Niño' Pagara, Merlito 'Tiger' Sabillo, Milan 'El Metodico' Melindo, comebacking Rey 'Boom Boom' Bautista ug AJ 'Bazooka' Banal.