Duha ka teams sa UAAP batok tulo sa CESAFI

Malingaw na sab ang mga Sugboanong mahiligon kaayo sa basketball tungod kay mobisita dinhi sa atong dakbayan ang UAAP reigning champion De La Salle University Green Archers ug ang perennial Final Four contender ang University of the East Red Warriors ubos sa bag-ong coach nga si Derek Pumaren.

Ang pagbisita dinhi sa La Salle ug U.E. kalabot sa lima ka adlaw nga Fil Oil- Flying V. Hanes Cup basketball tournament gikan sa Mayo 21 ngadto sa 25. Ang mga duwa sa unang tulo ka adlaw himoon didto sa Mandaue City Sports and Cultural Complex samtang ang nahibiling duha ka adlaw mobalhin didto sa Hoops Dome sa Lapu-Lapu City.

Ang Green Archers ug ang Red Warriors molingaw kanato sa UAAp-brand of basketball apan tungod kay nia man sila mosulong sa atong balwarte, nakaseguro ako nga ipakita sab sa atong mga pambato sa Cebu Schools Athletic Foundation, Inc. (CESAFI) ang ilang abilidad atubangan sa gatosan o liboan ka fans.

Ang mga CESAFI teams nga makigharung batok sa La Salle ug U.E mao ang 10-time CESAFI champion University of the Visayas (UV) Green Lancers, runner-up ug PCCL champion Southwestern University (SWU) Cobras ug ang nagka-umento ug sumusulbong nga University of San Carlos (USC) Warriors nga nagpakita og katakos didto sa San Juan Arena sa miaging semana dihang ilang gipilde ang Lancers, 77-72.

Samtang nakadaginot og 1-2 record ang Warriors didto sa maong torneyo, katingad-an kaayo nga 0-3 ang UV didto ug dili kini maayong senyales sa usa ka CESAFI champion tungod kay ang buot ipasabot niini nga dinhi mismo sa Sugbo, duna na gyud teams nga andam makigpinaksitay kanila. 

Sa CESAFI, gituyo gani og skedyul sa hapon ang mga duwa sa high school aron pagpadugok sa katawhan. Ang naandan nato dinhi nga magpanon ngadto sa gym human panihapon ilabi na kay dunay mga salida sa TV nga ilang gi-atangan. Bata, tiguwang, lalaki, babaye kon mahuwang nagkagubot karon sa salidang "The Legal Wife" ambot kanus-a isalida and "The Illegal Husband" kung naa man gani.

Didto sa Hoops Dome sa Mayo 24 ug 25, tiwason ang torneyo diin magsangka ang U.E batok UV ug ang La Salle batok SWU ug sa kataposang adlaw, magsangka ang U.E batok SWU ug ang La Salle batok sa USC.

Jr.NBA ug Jr. WNBA. Atong ipahibalo dinhi ning atong lindog  nga tulo ka Sugboanon ang napili sa Jr. NBA ug sa Jr. WNBA.

Dunay gipili nga 15 ka mga batan-ong players nga misalmot sa clinic sa Jr. NBA ug sa Jr. WNBA nga gipahigayon sa lain-laing dapit sa Pilipinas. Dunay 15 ka mga players sa tibuok nasud ang napili ug tulo niini ang gikan sa Sugbo--- duha ang lalaki ug usa ang babaye.Taga Cebu sab ang nakadawat sa pasidungog nga Alaska Sportsmanship Awardee nga si Lyniel Padilla.

Ang palarang mga napili gikan sa Sugbo sulod sa napulo ka lalaki nga Jr. NBA mao silang Andrew Velasco ug Jethro Rocamora nga maoy labing gamay sa grupo ug ang usa ka babaye gikan sa lima nga napili sa Jr. WNBA nga mao si Mary Jean Pascual. Ang mipahibalo kanato mao ang Alaska Jr. NBA ug Jr. WNBA Project Manager nga si Yam Maramba kinsa mi-email sa SPORTSgab sa miaging semana. Congratulations to all of you  guys!!!

MISCELLANEOUS. Our deepest sympathy to the Quindao Family of barangay Owak, Ormoc City who mourned for the death of 88-year old Crispin "Pino" Quindao last May 16. He is the father-in-law of my sister Gina M. Quindao whose husband Pedro "Boy" Quindao hails from Ormoc. Interment will be on Saturday, May 24.