PBA Governor's Cup sugdan karon

CEBU, Philippines -  Human sa Commissioner's Cup niadtong Huwebes, sugdan na sab dayon karong adlawa  ang 2014 PBA Governor's Cup didto sa Smart Araneta Coliseum.

 Unang magsangka mao ang  Barako Bull Energy Cola  ug Meralco Bolts sa alas-3 sa hapon, sa dili pa ang lahugay tali sa Alaska Aces ug San Miguel Beermen sa alas-5:15 sa hapon.

 Ang Governor's Cup maoy katapusang conference sa liga sa dili pa sila temporaryo mosira aron mohatag og panahon sa mga PBA cagers nga lakip sa national team nga makapangandam alang sa FIBA World Cup sa Agosto didto sa Spain.

 Ang Meralco ni coach Ryan Gregorio mosandig sa ex-NBA cager nga si Terrence Williams sa ilang  sangka sa Barako Bull nga moparada ni Eric Wise isip ilang import.

 Sa main game, si Reggie Williams nga katapusang miduwa sa Oklahoma City Thunder atol sa regular season sa NBA, mopakita sa iyang labok sa Beermen uban ni reigning MVP Arwind Santos, Junemar Fajardo, Sol Mercado ug Marcio Lassiter.

 Iyang atbangan ang katakus ni  Aces import Bill Walker. Maghangad sab siya og suporta gikan sa lokal sama nilang Cyrus Baguio, Sonny Thoss, Calvin  Abueva   ug  JV Casio. (BANAT NEWS)