Echavez nanghawod sa 2014 Olango Swim Challenge

CEBU, Philippines -   Si Loren Dale Echavez maoy labing paspas sa iyang dibisyon atol sa 2014 Olango Challenge niadtong Sabado didto sa Crimson Resort and Spa sa Lapu-Lapu City.

 Si Echavez sa Team RAFI mitapos sa 6-kilometer open water swim sud sa usa ka oras, 20 minutos ug 1.90 segundos.

 Ang mga pambato sa Cebu Blue Marlins nga sila si Trina Caneda (1:42:05) ug Romylin Ignacio (1:49:05) maoy miangkon sa ikaduha ug ikatulo nga dapit.

 Ang ilang teammate nga si Michael Ichiro Kong, kinsa mao unta ang nag-una sa men's class, na-disqualify sa pasangil nga matud pa mi-shortcut sa rota.

 Tungod niini, ang defending champion nga si Keith Ashley Ocampo maoy gideklarar nga mananaog ug  nadepensahan ang iyang titulo. Si Ocampo mioras 1:29:08, samtang si Alfred Rojo mipuwesto sa ikaduha sa oras nga 1:31:02. Si Lorenzo Abello (1:32:13) mitugpa sa ikatulong dapit.

 Sa 2K class, si Jebb Cane maoy naghari sa men's open sa oras nga 30:17, gisundan nila ni Aaron Grant Embuscado sa ikaduha sa oras nga 30:53, samtang si Simon Harvey maoy third placer sa oras nga 30:56.

 Sa iyang bahin, si Dennis Marie Ong maoy labing paspas sa women's side sa oras nga 32:51.  Iyang gilupig silang Danielle Mae Ballesteros (32:55) ug Shane Allyne Pareja (36:52). (BANAT NEWS)