37 ka atleta ipadala sa Lapu-Lapu City alang sa PNG

CEBU, Philippines -  Katloa'g pito (37) ka mga atleta ang ipadala sa dakbayan sa Lapu-Lapu alang sa Philippine National Games (PNG) nga  gikatakda sa Mayo 16-25 didto sa kaulohan.  Si Lapu-Lapu City Mayor Paz Radaza nakigkita sa 37 ka mga atleta atol sa ilang "send-off" ceremony sa City Hall.  Ang delegasyon molarga  na paingon sa kaulohan karong adlawa.

 Matud pa ni Radaza human niya madawat ang imbetasyon gikan sa mga organizers sa PNG,  nakig-coordinate dayon siya sa DepEd aron ipadala ang ilang mga banggiitang magduduwa nga nakahatag og dungog sa dakbayan atol sa bag-o lang nahuman nga Central Visayas Regional Athletic Association (CVIRAA) Meet.
 Gumikan niini, si Lapu-Lapu City Sports Commission Engr. Norvin 'Tata' Ymbong mihashas dayon sa lima ka mga events nga angayang salmotan sa dakbayan sa Lapu-Lapu. Kini naglakip sa arnis, archery, athletics, gymnastics ug chess.
 Ang gold medalist sa CVIRAA nga si Lovely Fe Andrin  sa Pajo National High School  misaad nga iyang paningkamotan nga modaog og bulawan sa dagan. Si Andrin midaog og bulawan sa 1,500 meter run sa katapusang CVIRAA.
 Gipaneguro usab sa mga opisyal sa DepEd Lapu-Lapu nga ilang monitoron ang mga partisipante aron maayo ang panglawas niini atol sa maong torneyo. (BANAT NEWS)