CVIRAA nakadaginot pa og gold pagtapos sa Palarong Pambansa

CEBU, Philippines - Gitapos sa Central Visayas ang ilang kampanya pinaagi sa pagkabkab og bulawan  sa  volleyball ug football events,  apan  ang CV  mitapos sa ikaupat sa overall sa 57th Palarong Pambansa nga natapos kagahapon didto sa Laguna Sports Complex sa Sta. Cruz, Laguna.

 Ang CV adunay kinatibuk-ang 92 ka medalya nga gibuak ngadto sa 24 golds, 27 silvers ug 41 bronzes human sa usa ka semanang kalihukan nga giisip nga Olympics sa elementary ug high school athletes sa nasud.

 Sa gilauman, ang National Capital Region (NCR) mao gihapon ang overall champion sa ilang 107 gold, 64 silver ug 56 bronze medals.

 Ang host Calabarzon mi-okupar sa ikaduha nga adunay 38 bronze, 51 silver ug 51 bronze medal-tally, gisundan sa Western Visayas nga adunay 32 golds, 33 silvers ug 38 bronzes.

 Mokompleto sa top 10 finishers mao ang CARAA (24-11-12), NMRAA (21-21-31), SOCCKSARGEN (15-17-30), DAVRAA (10-20-21), BRAA (9-6-22) ug  CLARAA (8-11-22).

 Ang Central Visayas mitapos sa ilang kampanya uban ang duha ka gold sa elementary volleyball ug football.  Gibidahan sa mga spikers gikan sa Catmon, ang CVIRAA mipukan sa host Calabarzon sa final match, 25-14, 25-19 aron makuha pagbalik ang crown nga nahanaw sa miaging tuig didto sa  Dumaguete City. (BANAT NEWS)