USPF misakmit men's title

CEBU, Philippines -  Ang tandem nilang Edmar Bonono ug Edward  Ybañez sa University of Southern Philippines Foundation (USPF) maoy naghari  sa men's division sa 2014 Nestea Beach Volleyball "Battle of Champions" sa miaging adlaw didto sa Boracay Island.

 Gipilde nilang Bonono ug Ybañez  ang tandem nilang Hachaliah Gilbuena ug Johnrel Amora sa University of Mindanao-Tagum, 21-14, 21-12 aron langkaton ang titulo human ang University of the Visayas (UV) napakyas sa ilang kampanya alang sa "grandslam."

 Sa wala pa ang championship, sila si Gilbuena ug Amora mipilde sa UV nga girepresentahan nilang Jade Becalde ug Mark Anthony Fernandez, 28-26, 21-19.

 Dili hinuon kini ikasakit sa UV kay usa ka semana ang ilang preparasyon alang sa maong kompetisyon.

 Ang UV nalandig sa ikatulo human midaog batok sa Southwestern University (SWU) nilang Rommel Pepito ug Relan Taneo, 21-19, 21-16.

 Sa women's division, ang De La Salle University nilang Kim Fajardo ug Victonara Galang mipilde sa Ateneo de Manila-University ubos nilang Shiela Pineda ug Amanda Villanueva aron masakmit ang korona.

 Ang SWU nilang Therese Rae Ramas ug Florimel Rodriguez mipahiluna sa ikatulo human nila gipalagpot sa trono ang defending champion Central Philippines University, 21-18, 21-14.