Lancers batok Warriors sa Coca Cola-PBA finals
CEBU, Philippines - Ang defending champion Lancers Basketball Club ug ang Cebu Warriors maoy mag-abot sa finals sa Coca Cola PBA Youngstars Basketball Tournament 2014 sa miaging adlaw didto sa Capitol Parish Gym.
Kini human sila midaog batok sa tagsa-tagsa nilang kontra. Ang Lancers milubong sa Cebu Elite, 83-47, samtang ang Warriors mibuntog sa Dragons Ballclub, 80-76.
Kini ang ikatulong sunod-sunod nga higayon nga magbagat sa finals ang Lancers ug Warriors ning tinuig nga torneyo nga gipasiugdahan sa Coca Cola ug sa Philippine Basketball Association.
Si Orlan Wamar mirehistro'g career-high 34 puntos aron pangulohan ang Lancers, kinsa miposte og 16-9 nga bentaha sa first period. Samtang si Kurt Amores mao sab ang topscorer sa Elite sa iyang 10 puntos.
Sa laing bahin, Sila si John Galinato ug Jean Jacque Antigua nagmangtas sa third quarter aron moposte'g 63-55 sa third period.
Misikit ang Dragons, 72-74 sa katapusang 1:30, apan human sa basket ni Marc Ting alang sa 78-74 nga abante, si Richmond Bulibuli nakapasulod og three-pointer aron mosikit pag-usab sa 77-78 sa nahabiling 30 segundos. Laing basket ni Ting maoy nagselyado sa kadaugan sa Cebu Warriors.
Si Antigua maoy topscorer sa Cebu Warriors nga miposa'g 24 puntos, samtang si Ting miamot og 22 puntos ug si Galinato mitampo'g 19 puntos.
Si Bulibuli maoy nangu sa Dragons sa iyang 27 puntos, gisundan ni Denzel Sabroso nga adunay 10 puntos.
Ang torneyo gipaluyohan sab sa local partner nga Cebu Youth Basketball League (CYBL) ubos sa Samahang Basketbol ng Pilipinas (SBP). (BANAT NEWS)
- Latest
