UV, USC mosalida na

CEBU, Philippines -  Mopakita na sa ilang unang labok ang Cebu-based teams University of the Visayas (UV) Green Lancers ug University of San Carlos (USC) Warriors  sa Filoil Flying V Hanes Premier Cup karong adlawa didto sa San Juan Arena.

 Ang UV ni coach Felix 'Donbel' Belano nga mao karon ang kampiyon sa Cebu Schools  Athletic Foundation Inc. (CESAFI) makigsangka sa Perpetual Help System Dalta sa alas-4 sa hapon samtang ang Warriors ni coach Junthy Valenzuela makigharong sa Jose Rizal University (JRU) Heavy Bombers sa alas-12:30 sa hapon.

 Ang UV ug USC  parehong  nahisakop   sa Group A uban sa laing usa pa ka Cebu  team Southwestern University (SWU) Cobras.

 Ang Senior A division maoy labing lig-on nga  grupo tungod kay nag-abot ang UAAP champion De La Salle University (DLSU) Green Archers ug  University of the East (UE) Red Warriors, ang perennial contender sa UAAP.

 Ang pagsalmot sa Lancers ug  Warriors sa Fil Oil preparasyon alang sa  2014 CESAFI season. (BANAT NEWS)