Texters, Painters magpinaksitay
CEBU, Philippines - Init ug kulbahinam nga serye ang masaksihan sa mga PBA fans sa panagharung sa top seed Talk ‘N Text Tropang Texters ug Rain or Shine Elasto Painters sa ilang ‘best-of-five’ semifinals series nga sugdan karong gabii didto sa Smart Araneta Coliseum.
Ang Texters ni coach Norman Black maoy labing unang koponan nga miabante sa Final Four human nila gidispatsar ang Barangay Ginebra San Miguel sa quarterfinals, samtang ang Painters milampos pagsud sa semis dihang ilang gipilde ang igsuong koponan sa Talk ‘N Text nga Meralco Bolts niadtong Sabado.
Ang Texters ug Painters kaupat mag-abot sa elimination round diin pulos sikit ang resulta sa ilang duwa diin walay koponan nga milabaw og tres puntos sa pagtapos sa duwa.
Sa iyang bahin, si Rain or Shine coach Yeng Guiao miingon nga daku iyang respeto sa koponan ni Black nga iyang giisip nga labing kusgan nga koponan sa conference, apan dili sila magpalupig ug suwayan nila nga mapukan ang Texters.
“You want to be the best, then beat the best – that simple,†matud pa ni Guiao sa The Philippine STAR.
Sa sayu nilang pagsud sa semis, ang Texters nakapahuway og dugay nga nakaayo sa ilang sinaligang import nga si Richard Howell kinsa hinay-hinay na nga nakarekober human sa nahiaguman niining back injury.
Si Howell usa sa nag-unang kandidato alang sa ‘Best Import’ award sa iyang average nga 22.7 points ug 19.8 rebounds matag duwa.
Ning higayuna si Howell sukdon sa import sa Rain or Shine nga si Wayne Chism kinsa nindot og gipakita sa quarterfinals batok sa Meralco. (BANAT NEWS)
- Latest
