San Mig, Rain or Shine mikompleto sa semis cast
CEBU, Philippines - Kompleto na ang upat ka koponan nga magsangka sa semifinals sa PBA Commissioner's Cup human midaog sa tagsa-tagsa nila ka tinaktakay nga duwa ang San Mig Coffee Mixers ug Rain or Shine Elasto Painters kagabii didto sa Smart Araneta Coliseum.
Ang San Mig mamasin nga makuha ang ikatulong sunod-sunod nila nga titulo karon nga conference, yanong mibuntog sa defending champion Alaska Aces sa iskor nga 79-65.
Sunod sangkaon sa Mixers maoy Air21 Express sa Martes sa "best-of-five" semifinals series.
Si Peter Jun Simon maoy leading scorer sa Mixers pinaagi sa iyang 21 puntos, samtang ang import nga si James Mays mirehistro og double-double nga miposa'g 17 points uban ang 24 rebounds.
Sa ilang bahin, ang Rain or Shine miagi pa'g kulbahinam nga duwa batok sa Meralco Bolts, 97-96 aron moabante sa Final Four.
Ang Rain or Shine mag-atubang og lisud nga hagit sa semis kay ang ilang ikasangka mao man ang topseed nga Talk 'N Text Tropang Texters ugmang adlawa.
Si Wayne Chism mirehistro og game-high 37 puntos, gisundan ni Paul Lee nga mitira'g 18 puntos alang sa Rain or Shine ni controversial coach Yeng Guiao.
Nausik ang 30 puntos ni Darnell Jackson alang sa Meralco, samtang si David kinsa adunay 20 puntos nagmahay sa iyang kaugalingon dihang wala niya mapasud ang iyang game-winning three pointer sa himalatyong segundos sa duwa. (BANAT NEWS)
- Latest
