Reichelt, Azkals balik Cebu
CEBU, Philippines - Mobalik na sab dinhi sa Sugbu ang Filipino-German booter nga si Patrick Reichelt dihang moduwa siya sa Philippine Azkals batok sa Malaysia Tigers sa "Face Off 2" karong Domingo diha sa Cebu City Sports Center (CCSC).
Si Reichelt, 25-anyos, kansang inahan gikan sa Argao sa habagatang Sugbu, milingaw sa mga Sugbuanong fans tungod sa iyang maayong labok nga gipakita atol sa miaging international friendly match batok sa Singapore Lions didto gihapon sa CCSC.
Ang Phl Azkals ubos sa pagpangulo sa managsuong Phil ug James Younghusband gikatakdang moabot dinhi sa Sugbu karong Biyernes.
Uban nila ni Reichelt ug sa Younghusband brothers mao sila si Anton del Rosario, Simong Greatwich, Eduard Sacapano, Patrick Deyto, Simone Rota, Ruben Doctora, OJ Porteria, Kenshiro Daniels, Daisuke Sato, Curt Dizon, Carlie De Murga, Chris Jason De Jong, Jovin Bedic ug Nick O'Donnel.
Lain pang unom ka magduduwa ang ilakip sa Azkals line-up ubos sa bag-o nilang American coach Tom Dooley.
Ang mga tiket sa Face Off 2 mahimong mapalit sa SM Cinema's ticket outlets o di ba ipaagi sa http://www.smtickets.com/. Ang mga tiket ubos sa extended bleacher nagkantidad og P1,000 alang sa premiere blue, white ug yellow, samtang ang premiere pink ug green mokantidad og P500. Sa VIP sections, mokantidad kini og P2,500, samtang ang ubang mga seksyon nagkantidad og P1,000 alang sa red, P750 sa white, P600 sa yellow ug blue ug P250 sa green ug pink.
Ang Face Off 2 nga gipasiugdahan sa Cebu Football Association (CFA) gipaluyohan sa Cebu City Government uban sa Cebu Landmasters, Smart, Gelatissimo, AboitizLand, Cebu Parklane International Hotel, Jonie's ug Dunkin Donuts. (BANAT NEWS)
- Latest
