Alcover vs. Bastida sa As-Es BAR finals
CEBU, Philippines - Nakuha sa Team Alcover ug sa Team Bastida ang duha ka luna sa finals human modaog batok sa tagsa-tagsa nilang kaatbang sa crossover semifinals sa As-Es B.A.R. First Conference basketball tournament sa miaging semana Huwebes didto sa Benjamin Solon Memorial Gym sa Cogon Ramos, ning siyudad.
Unang nakasud sa finals ang Team Alcover dihang ilang gitagak ang Team Endab, 82-79 pinaagi sa ilang mainitong rally sa final period.
Ang Team Alcover gilubong og kapin katunga paghuman sa unang 10 minutos sa duwa, 14-33 dihang nanginit og sayo ang usa sa mga sinaligan sa Team Endab nga si Swat Man Bart Sanchez.
Mibangon ang Team Alcover sa second period pinaagi sa ilang 25-16 run nga maoy gihimo nilang taytayan aron makabuylo sa final period.
Sa giya nilang Gerald Ylaya ug Randyll Roncal, ang Team Alcover mipabuhagay og 23 puntos sa final period ug gitugotan lang nila ang Team Endab nga moiskor og otso puntos.
Si Ylaya mipupo'g 24 puntos, lakip na ang lima ka triples, samtang si Roncal miabuno'g 21 puntos alang sa Team Alcover. Misuporta sab si Lemar Alcover, kinsa mihimo'g double-double pinaagi sa iyang 13 puntos ug 12 ka rebounds, samtang si Kirby Raboy miariya og 12 puntos.
Si Sanchez mao sab ang nangu sa Team Endab nga mitikdol og 20 puntos, gisundan ni Arjohn Colinarez nga mitimang og 12 puntos ug nilang Tedong Mendoza ug Martin Coyoca nga adunay 10 puntos matag usa.
Sa laing bahin, ang Team Bastida mihimo sab sa ilang kaugalingong diskarte aron mapilde ang Team Lim, 93-86 ug ingon man maangkon ang ikaduhang lingkoranan sa finals.
Human sa 53-64 nga biya sa third quarter, ang Team Bastida kalit lang miarangkada diin mitusak kini og 40 puntos sa fourth period.
Ang pointguard nga si Louie Tanggol mao na sab ang nangu sa Team Bastida nga mikamada og 30 puntos. Nakakuha sab siya og suporta gikan ni Reynolds Zamora nga miani'g 18 puntos.
Nahugyaw ang mga tawo sa second period sa gihimong reverse lay-up ni kanhi CSAT Builders Noel Godiz.
Tulo ka players ang mikulit og double figures alang sa Team Lim sa pagpangulo ni Nilo 'Robocop' Dan-Dan sa iyang 20 puntos. Ang Batman ug Robin sa Team Lim nga silang Glenn Birao ug Erwin Ferrer nagkumboya'g 34 puntos ug si Brikmer Alesna adunay 11 puntos.
Ang 3-pointer ni Arvin Rodriguez sa nahabiling 1:59 sa final period ug ang crucial free throws nila ni Richard Lanutan ug Rocky 'Robacs' Bacalso maoy tukmang yawi nga makaabli sa pultahan sa kalampusan sa Team Bastida.
Si Bacalso mihipos og 13 puntos, samtang sila si Lanutan ug Rodriguez mipaksit og 10 puntos matag usa.
Ang Alcover-Bastida final showdown duwaon karong Huwebes sa alas-8:30 sa gabii human sa duwa tali sa Team Endab ug Team Lim nga magsangka alang sa ikatulong puwesto.
Puntos Matag Usa
Unang duwa:
ALCOVER (82) – Ylaya 24, Roncal 21, Alcover 13, Raboy 12, Do 5, Piñas 2, Cimafranca 2, Capoy 1, Aliñasan 1.
ENDAB (79) – Sanchez 20, Colinarez 12, Mendoza 10, Coyoca 10, Torres 9, Realista 8, Sidro 6, Endab 5.
Ikaduhang duwa:
BASTIDA (93) – Tanggol 30, Zamora 18, Bacalso 13, Lanutan 10, Rodriguez 10, Godiz 2, Sabay 2, Rojas 2, Bastida 2, Aniñon 2, Obcial 2.
LIM (86) – Dan-Dan 20, Birao 18, E. Ferrer 16, Alesna 11, Esplanada 7, Cabrera 5, T. Ferrer 4, Magsayo 2, Jurado 2, Lim 2, Tañajura 1. (BANAT NEWS)
- Latest
