Bag-ong hulagway sa Playoffs

CEBU, Philippines - Welcome to the NBA Playoffs.  Mao kini kanunay ang atong makita sa commercial sa cable TV.

 Sugod karon hangtod sa NBA Finals, kabahin na kini sa playoffs kay natapos na man niadtong Huwebes ang 2013-2014 regular season.

 Bag-o na karon ang hulagway sa playoffs ilabi na sa Eastern Conference diin didto ipunting ang daghang pangutana lakip na niini kung makahimo ba og three-peat ang Miami Heat o si LeBron James ba gihapon maoy mapiling MVP.

 Ania ang lakbit-asoy sa NBA Playoffs karong tuiga.

 Labing makapaisa sa kilay mao ang gihimo sa Toronto Raptors, kinsa wala moabante sa playoffs sa miaging tuig kay sa ilang franchise record nga 48 ka daog (48-34), sila maoy nakakuha sa ikatulong pwesto sa East.

 Wala gani sila moabante sa playoffs sa miaging tuig diin ang ikawalo nga misulod mao ang Milwaukee Bucks nga karon maoy pinakahuyang ug pinakabati og rekord sa 30 ka teams sa ilang 15-67.

 Maoy ikasangka sa Raptors sa first round ang No. 6 Brooklyn Nets nga maoy ikaupat sa miaging tuig. Apan unsa man kaha ang atong mapaabot sa Raptors batok sa Nets nga maoy bugtong mipusoy sa Heat (4-0) karon nga season. Hinuon sa 2-2-1-1-1 format (seven games), suwerte ang Raptors kun modaog og sagunson duha ka duwa didto sa ilang homecourt. Ang nakabentaha lang gyud kay sila maoy host sa upat ka duwa sa playoffs.

 Moduwa na sab karong adlawa ang topseed sa East nga Indiana Pacers, kinsa maoy host batok sa Altanta Hawks. Ang Pacers mao karon ang gihugon-hugonan nga makig-rematch batok sa Heat sa East finals. Ang pangutana, hinog na ba gyud kaha ang Pacers alang sa playoffs nga gani sa nahibiling pipila ka duwa sa regular season kanunay man silang masukamod.

 Didto sa West, unang mopakita'g labok ang No. 3 seed Los Angeles Clippers nilang Chris Paul ug Blake Griffin batok sa ilang silingan ang No. 6 Golden State Warriors nilang Steven Curry ug Klay Thompson nga giila isip "Splash Brothers."

 Ang katapusang mopakita'g aksyon karon sa unang adlaw sa playoffs mao ang No. 2 seed sa West Oklahoma City Thunder, ang title contender sulod sa miaging tulo ka tuig, apan wala pa makatilaw og championship.

 Miabante sila sa NBA Finals, apan napilde sa Heat, 4-2 niadtong 2012 season.

 Ang Thunder mosuway pagbawos sa No. 7 seed Memphis Grizzlies, kinsa maoy mitagak kanila sa second round sa miaging tuig. Maingon nato nga usa sa hinagiban sa Grizzlies ang ilang depensa, apan mosaler pa ba kaha kana karong higayona?

 Dili lang kay uhaw, apan gutom pa gyud kaayo ang Thunder nga modaug og titulo sa NBA.

 Hangtod anaa kanila ang scoring leader nga si Kevin Durant, aduna gyu'y paglaum.  (BANAT NEWS)