Abellar hari sa 15th Ornopia Cup

CEBU, Philippines - Miarangkada dayon  ang   Sugbuanong rider nga si  Juvenelle  Abellar  aron mokabkab og duha ka titulo sa first leg sa 2014 MS Motosuit Motocross Series niadtong Domingo didto sa world-class racetrack sa Barangay Calambua, sa  San Remigio sa amihanang Sugbu.

Bisan pa sa kadangog ug  lapukon ang racetrack tungod sa uwan,  ang  beteranong si Abellar nakahimo gihapon sa pagdominar sa premiere expert open ug sa intermediate open divisions ning maong lumba nga giuloha'g "15th Ornopia Motocross Cup."

Nakuha ni Abellar ang premiere open title human niya gipilde sila si Jules Bandiga sa Dinacat Racing sa Davao City ug Cyril Tariman nga miangkon sa ikaduha ug ikatulo nga dapit.

Gibira sab ni Abellar ang intermediate division title batok ni John Flores, samtang si Jules Bandigan mi-okupar sa ikatulo.

Sama ni  Abellar, si BJ Pepito misakmit sab og duha ka korona pinaagi sa mini class 85cc. ug mini 65cc.

Si Clinton Cualiza midaog sab og duha ka titulo ubos sa local enduro ug underbone divisions.

Mikawat  og salida si   Jed Luna sa open enduro dihang iyang gipilde silang Donkey Sanchez ug JR Cualiza.

Hinuon, si  Sanchez  nakabawi dihang iyang giharian ang beginners open production, sila si  AJ Bubuli sa Team Bubuli-Davao ug JD Cuesta mipahiluna sa ikaduha ug ikatulong dapit.

Ang bisitang si Bubuli   miuli bitbit ang novice open production title batok ni Risty dela Calzada, samtang si JP Cuesta nalandig gihapon sa ikatulo.

Gidominar ni Nelson Sicad ang executive A batok ni Keiz BJ big boss Siegfred Ornopia. Si Jun Enriquez mi-okupar sa ikatulong dapit.

Si Nonoy Reluya mao sab ang naghari sa executive B, gisundan nilang Ornopia ug Enriquez.  Ang top three sa  executive C mao sila si Alan Padica, Arnel Enriquez ug Tata Omoli.

Sila si RK Cuesta, Marielle Mae Villafuerte ug Jeanette Olanda sa JTW Sibonga  mao ang top three sa ladies (special event) ning usa ka adlaw nga lumba ni businessman-sportsman ug Calambua barangay captain Lou Ornopia.

Ang second leg gitakda sa Mayo 24 didto sa Borbon, samtang ang third leg sa Hunyo 6 didto sa Toledo City. (BANAT NEWS)