PBA veteran players may paglaum pa

CEBU, Philippines - Gikalipay sa mga veteran professional players ang lakang sa PBA sa pagdawat sa NLEX, Kia ug Blackwater isip bag-ong mga koponan sa liga.

Usa sa nalipay sa ihatag unya nga oportunidad sa maong mga koponan ngadto kanila mao si veteran forward Don Allado, kinsa usa ka free-agent karon human miduwa sa Meralco Bolts.

"This is not just for me. But it's all about new chances for other deserving players who lost spots in their respective teams," matud pa ni Allado sa Spin.ph

Ang pagsulod sa tulo ka koponan nagpasabot nga kapin 40 ka free agents ug unsigned rookies ang adunay kahigayonan nga makaduwa sa PBA.

Gawas ni Allado, naglaum sab nga makabalik og duwa sa PBA mao sila si Renren Ritualo, Rich Alvarez, Wesley Gonzales, Leo Avenido ug Roger Yap.

Sa laing bahin, gitun-an karon ni PBA Commissioner Chito Salud ang posiblidad nga usa ka "direct hiring" ang mahitabo diin dad-on sa maong mga koponan ang ilang mga players gikan sa PBA D-League ngadto sa PBA.

Ang NLEX ug Blackwater mga koponan sa PBA D-League sa wala pa sila motikang sa PBA. (BANAT NEWS)