Team Alcover nakabuling sa rekord sa Team Lim

 CEBU, Philippines -  Bugtong ang Team Alcover na lang ang koponan nagbarog nga wala'y pilde human moiskor og daog batok sa Team Lim, 87-83 sa As-Es BAR First Conference basketball tournament niadtong Huwebes didto sa Benjamin Solon Memorial Gym sa Brgy. Cogon Ramos, Cebu City.

 Nagmangtas na sab si Randyll Roncal nga mikandos og 43 puntos aron pangulohan ang Team Alcover, kinsa nagbitbit og 2-0 nga baraha.

 Gawas sa ilang limpiyong baraha, ang Team Alcover mao sab ang nakabugto sa tulo ka sunod-sunod nga daog sa Team Lim.

 Ang katimbang ni Roncal nga si Gerald Ylaya mitampo'g 18 puntos alang sa Team Alcover, kinsa nakabawi gikan sa 16-30 nga lubong paghuman sa unang 10 minutos sa duwa.

 Didto na sa third period nakabangon ang Team Alcover, kinsa hinay-hinay nga mikitkit sa labaw hangtod nga nasakmit ang momentum, 65-63 paingon sa final period.

 Mibahar ang duwa sa tandem nilang Erwin Ferrer ug Glenn Birao nga igo lang nagkumboya'g 39 p untos. Si Ferrer mipupo'g 20 puntos, samtang si Birao miani'g 19 puntos alang sa Team Lim nga adunay 3-1 nga baraha ning maong torneyo nga gipasiugdahan sa As-Es Sportswear ni Adlaon Brgy. Capt. Elvis Narra ug sa Basketball Association of Ramos (BAR) ubos sa liderato ni OIC  Noel Godiz uban sa iyang committee chairman Reynold Zamora ug  tournament committee  head  Kap Elvis Narra.  Sila si Richard Regidor, Raul Endab, Lemar Alcover, Vergel Fuentes, Andrew Biton, Leo Villaber, Allan Abella, Glenn Birao, Brikmer Alesna, Edgar dela Calzada,  Art Arellano, Rick Bastida ug Randyl Roncal maoy mga board of trustees.

PUNTOS MATAG USA

 TEAM ALCOVER  (87) - Roncal 43, Ylaya 18, Raboy 8, Capoy 7, Collonia 5, Villarba 4, Aliñabon 2.

 TEAM LIM (83) - E. Ferrer 20, Birao 19, Alesna 9, T. Ferrer 8, Cabrera 7, Abelgas 5, Dan-Dan 4, Esplanada 4, Jurado 3, Lim 2, Tañajura 2.  (BANAT NEWS)