Mangosong midaog duha ka titulo sa Supercross series

CEBU, Philippines -   Garbo sa Mindanao nga si Rhowell 'Bornok' Mangosong maoy migawas nga mananaug human niya unhi sa finish line si multi-titled Cebuano Jon Eleazar Adlawan sa pro open category sa 2nd leg sa Man and Machine supercross series didto sa South Road Properties (SRP) grounds.

 Sikit ang duha ka batan-ong riding sensation sa lumba, apan nakahunat si Mangosong sa final laps nga maoy nahimong taytayan sa iyang kadaugan.

 Laing Sugbuanon nga si Jubenile Abellar mipuwesto sa ikatulong dapit, samtang si John Flores ug Jacob Orbe maoy mikompleto sa top five finishers.

 Nakuha ni Mangosong ang ikaduha niyang titulo dihang gidominaran niya ang pro lite category batok nilang Abellar ug Adlawan.

 Si Jougee Basco maoy mihari sa intermediate ug beginners open production, samtang si Flores mao ang nanghawod sa novice open production. Giharian ni Esrael Larido ang underbone class, samtang si RK Cuesta  sa women’s division.

 Lain pang nikampiyon sa tagsa-tagsa nila ka dibisyon mao sila si Charlie Pascua (peewee 50cc), Bill Pepito (peewee 65cc ug mini), Clinton Gualiza (local enduro), Jed Luna (open enduro), Dexter Bacabac (veterans A) ug Roscel Gungob (veterans B ug C).

 Gipasiugdahan sa Man and Machine Racing Promotions, ang lumba gisuportahan usab sa Cebu City Government, Kopiko, Rusi Motors, Jela Construction, Sel-J motorsports ug Nature's Spring Waters.  (BANAT NEWS)